கீனா 3 #என்_நாடு_என்_மக்கள்

"அங்கப் பாருங்க சார். அதெல்லாம் சாமியா? இல்ல. முருகன் தான் சாமி. இந்தாங்க பிரசாதம், திருநீறு பூசிக்கிறீங்களா? என்ன இதுல எல்லாம் நம்பிக்க இல்லியா? அப்போ நீங்க வேதமா? எந்த வேதம்? மூணு வேதம் இருக்குல்லா? என்ன எல்லாம் ஒண்ணு தானா? நான் கூட ஏசுவுக்கு மெழுவுத்திரி எல்லாம் பொருத்தி வச்சிருக்கேன். ஏசுவ மாதிரி என்னையும் சிலுவையில அடிப்பாங்களா? வீட்டுல அடிச்சாலும் சரி, ஊருல அடிச்சாலும் சரி, ஆத்துல அடிச்சாலும் சரி... அன்னைக்கி ஆத்துல குளிச்சிட்டு இருக்கம்போது எவனோ இருநூறு ரூபாய எடுத்துட்டுப் போயிட்டான். சருவப் பையில போட்டு வச்சிருந்தேன். இங்கப் பாருங்க இந்த சருவப் பை மாதிரி தான். என்னப் பாத்து கீனான்னு கூப்பிடுவானுங்க. என் பேரு கிருஷ்ணன். கீனாவாம்... நான் கெட்ட வார்த்த சொல்லித் திட்டிப்புடுவேன். நீங்க இருக்கீங்க. வாயில கெட்ட வார்த்த வருது. நீங்க என்ன எப்படி கூப்புடுவீங்க சார். "பெரியவரு".  பாருங்க சார் நீங்க நல்லவரு. பெரியவருன்னு சொல்லுதீங்க. கீனாவாம். எனக்கு கோவம் வரும். அதான் அப்படித்தான் திருச்செந்தூர்ல ஆபீசர் கிட்ட பேசும் போது கோவம் வந்துட்டு. கெட்ட வார்த்த சொன்னேன் அவரு திட்டிப்புட்டாரு. நான் இங்கப் பாருங்க இப்படி வாயப் பொத்திக்கிட்டு கடல் பக்கமா போயிட்ட்டேன். எனக்கு கோவம் வரும் சார். என் பொண்டாட்டி எனக்கு மரியாதையே தரமாட்டா. கொண்டையப் பிடிச்சு இழுத்து அடிச்சிப்புடுவேன். வீட்டுக்குப் போனா காப்பி குடிக்கியளான்னு கேக்க மாட்டா. நீங்க எனக்கு டீ வாங்கிக் குடுத்தீங்க. எவ்வளவு சார் ஒரு டீ ? என்ன பத்து ரூவா குத்தீங்களா? சில்லற தரலியா? அடுத்த பெட்டியில போய் அவங்கிட்ட மீதிக் காச வாங்கணும் சார். விடக்கூடாது. திருநவேலியில போய் அவங்கிட்ட கேக்கணும். முருகன் கூட தெய்வானை கிட்ட கோவிச்சுக்கிட்டுத் தான் வள்ளிய கல்யாணம் பண்ணிக்கிட்டாரு. நானும் இன்னொருத்திய கல்யாணம் பண்ணிக்கப் போறேன்னு முருகன் கிட்ட சொல்லிட்டேன். அவரு சரின்னு சொல்லிட்டாரு. நான் சுகமில்லாமப் போயிட்டா பாத்துக்கணும் இல்லியா? வேட்டியத் தொவச்சிப் போடணுமில்லா?"

"உங்களுக்கு கல்யாணம் ஆயிட்டா? பிள்ளங்க எல்லாம் இருக்கா? ஆகலியா? அப்பா அம்மா இருக்காங்களா? இல்லியா ? அப்போ நாம ரெண்டு பேரும் ஒண்ணு. உங்க அம்மா உங்களுக்கு எத்தன வயசு இருக்கும் போது செத்துப் போனங்க? நான் ஏழு வயசா இருக்கும் போது எங்க அம்மா செத்துப் போயிட்டாங்க. நான் இவ்வளவு உயரம் தான் இருந்தேன். அங்கப் பாருங்க அந்தா தூங்கிட்டு இருக்குதே அந்தப் பிள்ள அது மாதிரி தான் நான் இருந்தேன். எனக்கு என்ன தெரியும். அழணுமா சிரிக்கணுமான்னு தெரியுமா? உங்க அம்மா எறந்து எத்தன வருஷம் ஆவுது? மூணு வருஷமா? அப்போ உங்களுக்கு அம்பது வயசு இருக்குமா? உங்களுக்கு ஐக்ரவுண்டு ஆஸ்பத்திரி தெரியுமா? நீங்க பாளயங்கோட்ட தான எப்பிடி தெரியாம இருக்கும். அங்க எனக்கு மனநிலம சரியில்லன்னு மருந்து குடுத்தாங்க. என் காலுல ஒரு புண்ணு இருக்கு. இங்கப் பாருங்க. டாக்டரு தான் மருந்து போட்டு விட்டாரு. "

"கலைஞரு எனக்குப் பிடிக்கும். அவரு குடுத்த பென்சன் தான் நான் வாங்கிட்டு இருக்கேன். வேற யாருகிட்டயும் நான் வாங்க மாட்டேன். இப்ப நான் வாங்கறதும் கலைஞர் குடுத்தது தான். எல்லாவனுங்களுக்கும் பண ஆச. காமராசரப் பாருங்க. அவரு பணத்துக்கே ஆசப்படல. அவரு செத்துப் போனது இங்கப்   பாருங்க இப்படி செத்துப் போனாரு. எல்லாவனுவளும் தடவித் தடவி தேடிப் பாத்தானுங்க. ஒரு வேட்டி ஒரு சட்ட. நூறு ரூபா தான் இருந்தது. அறுநூறு கோடி ரூபா எல்லாம் கடத்துறானுங்க. காமராசர் மாதிரி வருமா. அவரு தாங்க கடவுளு. அவர நீங்க என்ன சொல்லி கூப்புடுவீங்க? தலைவருன்னா? அவர மாதிரி தலைவரு இப்போ யாரு இருக்கா?"

இன்றைய காத்திருப்புக்கும் முடிவு வரப் போகிறது. அடுத்து நான் தான் மேனேஜரைப் பார்க்கப் போக வேண்டும். மீண்டும் அடுத்த காத்திருப்பில் கீனா-4 வது (கடைசி) எபிசோடில் சந்திப்போம்.